स्थानिक बातम्या
ऊंब्रज / प्रतिनिधी
या मोहिमेत सहभागी होण्यासाठी संपूर्ण देशभरातून १५० उत्कृष्ट सायकल रायडर्सची निवड करण्यात आली असून, त्यापैकी महाराष्ट्रातून केवळ २८ रायडर्सना संधी लाभली आहे. या निवड झालेल्या मोजक्या रायडर्समध्ये ऊंब्रज सायकल राईडर्सचे आधारस्तंभ आणि सायकलिंग क्षेत्रातील प्रेरणादायी व्यक्तिमत्व श्री. सचिन निकम (बापू) यांची निवड झाली असून, हा ऊंब्रज व सातारा जिल्ह्यासाठी अभिमानाचा क्षण ठरला आहे.
सचिन निकम यांनी सायकलिंग क्षेत्रात गेल्या काही वर्षांत सातत्याने उल्लेखनीय कामगिरी केली आहे. फिटनेसप्रेमी युवकांसाठी ते आदर्शवत प्रेरणास्थान बनले आहेत. ग्रामीण भागात सायकलिंग संस्कृती रुजविण्यासाठी त्यांनी अनेक मोहिमा आणि सामाजिक उपक्रम राबविले आहेत. त्यांच्या सायकलिंगमधील जिद्द, शिस्त आणि फिटनेसप्रती असलेला निष्ठावान दृष्टिकोन यामुळेच त्यांची देशस्तरावर निवड झाली आहे.
ही मोहीम कश्मीरपासून कन्याकुमारीपर्यंत — एकूण ४,२४९ किलोमीटर अंतराची — असेल. थंडी, डोंगराळ प्रदेश आणि विविध हवामानातील आव्हाने पार करत, देशाच्या एकतेचा आणि तंदुरुस्तीचा संदेश ही मोहीम देणार आहे. या प्रवासाद्वारे “एक भारत, श्रेष्ठ भारत”चा संदेश प्रत्यक्ष कृतीतून साकार होणार आहे.
या यशाबद्दल ऊंब्रज परिसरात आनंदाचे वातावरण असून, सचिन निकम (बापू) यांचे सर्व स्तरातून मनःपूर्वक अभिनंदन केले जात आहे. स्थानिक क्रीडाप्रेमी, युवा आणि नागरिकांनी त्यांना शुभेच्छांचा वर्षाव केला आहे.
ऊंब्रज सायकल राईडर्सचे सदस्य आणि ग्रामस्थ यांनी व्यक्त केले — “बापूंची ही निवड आमच्यासाठी अभिमानाची बाब आहे. त्यांच्या प्रयत्नांनी अनेकांना सायकलिंगकडे आकर्षित केले आहे.”
भारताच्या एका टोकापासून दुसऱ्या टोकापर्यंत सायकलवर देशाची एकता आणि आरोग्याचा संदेश नेणारे सचिन निकम (बापू) यांना मनःपूर्वक शुभेच्छा!
अभिनंदन सचिन बापू, तुम्ही ऊंब्रजचं नाव उज्ज्वल केलंत!
