स्थानिक बातम्या
शुभम गुरव, पिंपोडे बुद्रुक
गेली तीन वर्षे रखडलेल्या जिल्हा परिषद आणि पंचायत समितीच्या निवडणुकांना अखेर मुहूर्त लाभला आहे. नुकत्याच जाहीर झालेल्या आरक्षण सोडतीनंतर पिंपोडे बुद्रुक जिल्हा परिषद गट पुन्हा एकदा सर्वसाधारण प्रवर्गासाठी खुला झाल्याने राजकीय तापमान चांगलेच वाढले आहे. गटात इच्छुकांची रांग लागल्याने उमेदवारीसाठी जोरदार रस्सीखेच सुरू झाली आहे.
मुळचा राष्ट्रवादीचा बालेकिल्ला म्हणून ओळख असलेल्या या गटात आता नव्या राजकीय समीकरणांची उलथापालथ सुरू आहे. राष्ट्रवादी (अजितदादा गट) आणि भाजपामध्ये युतीच्या चर्चांना वेग आला असून, युती झाली तर "युती विरुद्ध राजे गट" अशी दुरंगी लढत रंगण्याची शक्यता आहे. अन्यथा तिरंगी किंवा चौरंगी लढत टाळता येणार नाही, अशी राजकीय वर्तुळात चर्चा आहे.
अजितदादा राष्ट्रवादी गटातून माजी कृषी सभापती मंगेश धुमाळ, डॉ. सुयोग लेंभे, सूर्यकांत निकम आणि प्रविण निकम ही नावे चर्चेत आहेत.
राजे गटाकडून माजी जि.प. सदस्य सतिश धुमाळ, माजी पं.स. उपसभापती संजय साळुंखे, अॅड. मेघराज भोईटे, आणि सुमित भोईटे हे दावेदार मैदानात आहेत.
भाजपाकडून माजी चेअरमन शहाजी भोईटे आणि विधानसभा सहसमन्वयक अमित चव्हाण यांच्या नावांची जोरदार चर्चा आहे.
विधानसभा मतदारसंघ पुनर्रचनेनंतर नव्या सोनके गणाचा उदय झाला आहे. हा गण सर्वसाधारण प्रवर्गासाठी खुला झाल्याने अनेक इच्छुक पुढे सरसावले आहेत. अजितदादा राष्ट्रवादी गटातून आकाश सोळस्कर, सागर जगताप, अमर धुमाळ; तर शरद पवार गटातून बाळासाहेब भोईटे, संदीप धुमाळ, जितेंद्र जगताप, भूषण पवार ही नावे चर्चेत आहेत.
शिवसेना (शिंदे गट) कडून संतोष सोळस्कर, तर भाजपातून युवराज धुमाळ, राजेंद्र धुमाळ, मयूर धुमाळ, अल्केश पवार या इच्छुकांची नावे चर्चेत आहेत.
पिंपोडे बुद्रुक पंचायत समिती गण सर्वसाधारण महिला प्रवर्गासाठी खुला झाल्याने महिलांच्या उमेदवारीसाठी तयारी सुरू आहे.
भाजपातून दिव्या पिसाळ आणि ज्योती लेंभे, अजितदादा राष्ट्रवादीकडून सुनिता सावंत व रसवंती चव्हाण, तर राजे गटाकडून भाग्यश्री भोईटे यांच्या नावांवर चर्चा आहे.
या भागात औद्योगिकीकरण, रस्त्यांचे प्रश्न, बेरोजगारी आणि पाण्याची टंचाई ही मुख्य निवडणूक विषय असतील.
“मतदार आता विकास पाहून निर्णय घेतो, गट-तट पाहून नव्हे,” असे एका स्थानिक नागरिकाचे म्हणणे आहे.
तर एका कार्यकर्त्याने सांगितले —
“पिंपोडे गट हा नेहमीच राजकीय दृष्टीने संवेदनशील राहिला आहे. येथील मतदार विचार करून मतदान करतात. त्यामुळे उमेदवारांना लोकसंपर्क आणि कामगिरी या दोन्हींची कसोटी द्यावी लागेल.”
मागील निवडणुकीत याच गटातून मंगेश धुमाळ आणि संजय साळुंखे हे दोघे निवडून आले होते. धुमाळ यांना जिल्हा परिषदेत कृषी सभापतीपद मिळाले, तर साळुंखे यांना पंचायत समितीचे उपसभापतीपद लाभले. दोघांनीही आपापल्या कार्यकाळात विकासकामे राबवली, मात्र आता ते विरोधी गटात असल्याने आगामी निवडणुकीत दोघे आमने-सामने येण्याची शक्यता आहे.
दुष्काळी भाग असल्याने पाणीप्रश्न हा मुख्य निवडणूक विषय ठरणार आहे.
बेरोजगारी, रस्ते, औद्योगिकीकरण आणि पायाभूत सुविधा हे मुद्देही मतदारांच्या निर्णयावर प्रभाव टाकतील.
तसेच कोणताही “भावनिक किंवा सार्वत्रिक प्रश्न” निवडणुकीच्या काळात उद्भवला, तर त्याच्याभोवती राजकारण फिरण्याची शक्यता नाकारता येत नाही.
एकंदरित, पिंपोडे बुद्रुक गटातील ही निवडणूक म्हणजे विकास विरुद्ध गटबाजी, अनुभव विरुद्ध नव्या चेहऱ्यांचे आव्हान आणि युती विरुद्ध स्वतंत्र लढाईचा कसोटी क्षण ठरणार आहे.
“पुढची निवडणूक केवळ मतांची नव्हे, तर प्रतिष्ठेची लढाई असेल,” असे राजकीय वर्तुळात बोलले जात आहे.
